નથી…

 નથી…

વાડ નાં આધાર વગર, વેલો ચડતો નથી,

ચાર જણનાં ખભા વગર, માણસ જતો નથી!

પથ્થર શાં પોલાં હોય છે, માનવીનાં મન,

વિશ્વાસનાં દોરા વગર, સંબંધ ટકતો નથી!

ઊંચી ઇમારતો, ‘ને મહેલમાં વસનારો,

નીચી નજર માંડીને, એમ કદી જોતો નથી!

છો છળતો રહે માનવી, પહેરીને મુખવટાં,

દર્પણની સામે, ચહેરો જુઠ બોલતો નથી!

અંધકારનાં ઓછાયામાં, છુપાયેલો સુરજ,

નથી ઉગવું કાલ, એમ કહી ડુબતો નથી!

પાષાણ થઈ ગયેલાં, લોકોનાં હૃદયમાં,

“ચાહત”નો ફુવારો, સહેલાઈથી કદી ફુટતો નથી!!

💕ચાહત💕

જાય છે…

 જાય છે…

કોઈક પરાયું, અંગત બની જાય છે,

સ્વજન થઈ કોઈક, આઘાત દઈ જાય છે!

મળે છે કેટલાંય, લોકો જીવનમાં,

કોઈ પગલાં અમીટ, છાપ છોડી જાય છે!

સંબંધોની વણજારમાં, મુંઝાય છે મન,

કેટલીક વાતો, મનનાં તળિયે, રહી જાય છે!

વિશાળ રત્નાકરનું, પેટાળ છે ઊંડું,

નદીને સમાવીનેય, પાણી, ખારું રહી જાય છે!

સ્વભાવથી પોતાનાં, ઓળખાય છે માણસ,

“ચાહત” મનની, ક્યારેક દગો, દઈ જાય છે!!

💕ચાહત💕

પાછાં નહીં આવે…

 પાછાં નહીં આવે…

ગયેલાં માણસો, પાછાં નહીં આવે,

કરીએ કદર, આપણે લોકોની!

તસ્વીર થઈ ગયેલાં સ્વજનો, પાછાં નહીં આવે!!

વિતેલા વરસો, પાછાં નહીં આવે,

સમજીએ કિંમત, દરેક ક્ષણની!

ભુતકાળનાં પગલાં વર્તમાનમાં, પાછાં નહીં આવે!!

બોલાઈ ગયેલાં શબ્દો, પાછાં નહીં આવે,

તોળીને બોલીએ, દરેક શબ્દને!

છુટી ગયેલાં તીર કમાનમાં, પાછાં નહીં આવે!!

નફરતથી બગડેલાં સંબંધો, પાછાં નહીં આવે,

“ચાહત”થી નિભાવીએ, દરેક સંબંધને!

રિસાઈ ગયેલાં આપ્તજનો, પાછાં નહીં આવે!!

💕ચાહત💕

આપણે તો, મોજમાં રહેવાનું…

ઉદાસી ભરેલી સાંજ છે,

પણ શાને, કાયમ રડવાનું?

સવાર, નવી ફરી ઊગશે,

ઉત્સાહથી, એમ જીવવાનું!

       આપણે તો, મોજમાં રહેવાનું!!

દાંત આપ્યાં તો, ચવાણું પણ આપશે,

ચિંતાથી, શાને મરવાનું?

અલગારી થઈ, ફરવાની છે મઝા,

કોઈની પંચાતમાં, નહીં પડવાનું!

    આપણે તો, મોજમાં રહેવાનું!!

ગતિમાન ધરતી ‘ને, ગતિમાન છે નક્ષત્રો,

દુનિયામાં, ભ્રમણ કરવાનું!

ભીતરનાં માંહ્યલાને સ્થિર કરીને,

જીવન એમ, જીવી જવાનું!

       આપણે તો, મોજમાં રહેવાનું!!

રોજ રોજ, મરીએ છે જીવીને,

જીવન, એમ શું જીવવાનું?

“ચાહત” મનની, પુરી કરીને,

જીવન એમ, સાર્થક કરવાનું!

        આપણે તો, મોજમાં રહેવાનું!!! 

💕ચાહત💕

અને આમ, નવું વર્ષ ઉજવાય…

વિકર્મ સંવત ૨૦૭૮નું નવું વર્ષ , સંપતિ, દીર્ઘાયુ, સલામતી, સૌભાગ્ય, સમૃદ્ધી અને સદભાવનાની અવિરત જ્યોત આપના જીવનમાં ઝગમગતી રાખે અને સુખ, શાંતિ, સમૃધ્ધિ માં ઉત્તરો ઉત્તર વધારો થાય,અને દરેક ક્ષેત્રમાં પ્રગતિ થાય એવી શુભકામના💐🙏🏻🙏🏻

 અને આમ, નવું વર્ષ ઉજવાય!

મંદીરોમાં અનનકુટ ને બદલે, જરુરતમંદ ને મદદ કરાય,

અવનવી મીઠાઈઓ થી, ગરીબ જઠરાગ્નિ જ્યારે ભરાય,

અને આમ, નવું વર્ષ ઉજવાય!

ફટાકડાંઓનાં ધુમાડાને બદલે, હતાશ મનમાં, દિવાળી ઉજવાય,

એક ઉત્સાહનાં કોડિયાથી, ઉરમાં હર્ષ નો દીપક પ્રગટાવાય,

અને આમ, નવું વર્ષ ઉજવાય!

નારી ને અબળા ને બદલે, શક્તિ માની પુંજાય, 

ઘરમાં એનાં પાવન પગલાં, લક્ષ્મી સ્વરૂપે ગણાય,

અને આમ, નવું વર્ષ ઉજવાય!

રાગ દ્વેષ ને ક્લેશ ને બદલે, પ્રેમ ને મહત્વ અપાય,

નફરત નહીં પણ, “ચાહત” ની, રંગોળી રુડી પુરાય,

અને આમ, નવું વર્ષ ઉજવાય!

ખોટી ઝાકઝમાળ ને બદલે, ભીતર જો ઉજવાય,

મલકતાં રહે હૈયાં ને, લાગણીનાં આસોપાલવ રોપાય, 

અને આમ, નવું વર્ષ ઉજવાય!

💕ચાહત💕