ખાસ, કંઈ મઝા નથી...

 ખાસ, કંઈ મઝા નથી...

એકબીજાંની નજીક જવામાં, 

ખાસ  કંઈ મઝા નથી,

ને, હદથી વધારે લગાવ કરવા જેવી, 

બીજી કોઈ સજા નથી!

ખોટા સપનાંઓ જોઈ  ઉંઘ બગાડવામાં, 

ખાસ કંઈ મઝા નથી,

ને, સપનાંઓ નાં વેશમાં હકીકત આવી  છળે, 

એવી બીજી કોઈ છલના નથી,

ખરી “ચાહત” મળવી જીવનમાં, 

એવી કોઈ પ્રથા  નથી,

ને, પ્રેમ કર્યા પછી પસ્તાવા જેવી, 

બીજી કોઈ ઘટના નથી!

💕ચાહત💕

પડે છે....

 પડે છે....

જુનું ભુલીને, નવું શીખવું પડે છે, 

જમાનાની સાથે, ચાલવું પડે છે!

લાગણીઓને, તળિયે દફનાવીને, 

હૃદયે  હંમેશા, ધબકવું પડે છે!

આંખોમાં અશ્રુ ને, હોઠો પર હાસ્ય, 

ચહેરાએ, નકાબ ઓઢવો પડે છે!

છુપાવીને, વિવિધ ભાવ ચહેરાનાં, 

પરાણે હંમેશા, હસવું પડે છે!

રોજ એક “પળ” જીવવાં, મરવું પડે છે,

 કેટકેટલું, આમ સહેવું પડે છે!

કશુંક, એક અમસ્તું મેળવવાં, 

કેટલુંય આમ, ગુમાવવું પડે છે!

મંઝીલ એક પામવાં, મથવું પડે છે,

 ચરણને, હંમેશા દોડવું પડે છે!

સફળતાનું, એક શિખર ચડવાં,

 પગથિયું પહેલાં, ઉતરવું પડે છે!

સુરજને પણ, સાંજે ઢળવું પડે છે, 

પોતાનું અજવાળું, સંકેલવું પડે છે!

પ્રકાશ પોતાંનો, બીજે પાથરવાં, 

પૃથ્વીની બીજી બાજુ, જવું પડે છે!

નફરતને, મહોરું  પહેરાવવું પડે છે,

 “ચાહત”થી, કામ લેવું પડે છે!

જિંદગી, પોતાની સુખ ચેનથી જીવવાં,

 કાયમ હંમેશા, કશુંક જતું કરવું પડે છે!

💕ચાહત💕

કયાં, એટલું સહેલું છે???

 

કયાં, એટલું સહેલું છે???

દોડીએ છે, અવિરત જિંદગીની દોડમાં,

મનને પળભર થોભાવવું, 

કયાં, એટલું સહેલું છે?

મળીએ છે, ફેસબુક ને ઇન્સ્ટાગરામ પર,

પોતાની જાતને મળવું, 

કયાં, એટલું સહેલું છે?

આપીએ છે, હજારો લાઈક કે કોમેન્ટ એક પોસ્ટ પર,

સામે ચાલીને, બીજાની પીઠ થાબડવું, 

કયાં, એટલું સહેલું છે?

લગાવીએ છે, એકમેકનાં વિશ્વાસ ને હંમેશા દાવ પર,

ખુદનાં વિશ્વાસ ને જગાવવો, 

કયાં, એટલું સહેલું છે?

મોકલાવીએ છે, ઢગલાબંધ ઈમોજીઓ લાગણીની એક ચિત્ર પર,

જિંદગીભર “ચાહત” નિભાવવી, 

કયાં, એટલું સહેલું છે?

💕ચાહત💕

કોઈક વાર, એવું થાય છે....

 

કોઈક વાર,એવું થાય છે....

કોઈક વાર, એવું થાય છે!

એક પળ જીવવામાં, જીવન આખું નીકળી જાય છે,

ને, મનગમતું કરવામાં, બીજાનાં દિલ દુભાય છે!

કોઈક વાર, એવું થાય છે!

સમયની સાથે દોડવામાં, વરસો બાજી જીતી જાય છે!

ને, રેત મુઠ્ઠી ભરવામાં, દરિયો સરી જાય છે!

કોઈક વાર, એવું થાય છે!

પૈસા ખુબ કમાવામાં, દિલ ખાલી થઈ જાય છે,

ને, જિંદગી પુરી કરવામાં, શોખ અધુરાં રહી જાય છે!

કોઈક વાર, એવું થાય છે!

સપનાંઓ મીઠાં જોવામાં, રાત આખી વિતી જાય છે,

ને, હકીકત સાથે બાથ ભીડવામાં, નીંદર પણ રાતે રિસાય છે!

કોઈક વાર, એવું થાય છે!

પ્રેમથી સાથ નિભાવવામાં, ઘણીયે તકરાર થાય છે,

ને,સાથ નિભાવતાં નિભાવતાં,”ચાહત” ભુલી જવાય છે!

કોઈક વાર, એવું થાય છે!

💕ચાહત💕

એ, હતી...

 

એ, હતી...

એ નદી હતી, 

જે પાછી કદી વળી નહીં,

ને, હું સમંદર હતો, 

આગળ કદી વધ્યો નહીં!

એ લાગણી હતી, 

જે પાછી કદી જડી નહીં,

ને, હું વળ અહમનો હતો,

 ફરી કદી ખુલ્યો નહીં!

 એ વાંસળી હતી, 

જે ફરી કદી વાગી નહીં,

ને, હું કૃષ્ણ હતો, 

યુદ્ધ કદી લડ્યો નહીં! 

એ “ચાહત”  હતી, 

જે મેં કદી, અપનાવી નહીં,

ને, ભુલ મારી હતી, 

જે મેં કદી, માની નહીં!!!

                

💕ચાહત💕

હું, વિચરી જઈશ...

 

હું, વિચરી જઈશ...

આંખોમાં તારી, 

અશ્રુ બનીને, ખટકી જઈશ,

ગુલમહોર મારી “ચાહત”નો આમ, 

તારી આંખોમાં, ઉગાડી જઈશ!

હાથોમાં તારી, 

જીવનરેખા બનીને, જીવી જઈશ,

લાલાશ કુમકુમની આમ,

તારી હથેળીઓમાં, ભરી જઈશ!

યાદોમાં તારી,

શબ્દો બનીને, વહી જઈશ,

યાદોની શૂન્યતા આમ,

કોરા કાગળ પર, લખી જઈશ!

જીવનનો તારા,

એક હિસ્સો બનીને, રહી જઈશ,

“ચાહત” ને  મારી આમ,

અમર કિસ્સો બનાવીને, 

અનંતમાં હું, વિચરી જઈશ!!!

💕ચાહત💕