જોને…

જો ને..…

હૃદય જો ને, ક્યારેક, લાગણીથી ડરે છે,

આંખોમાં જો ને, વ્યથા છુપાવીને રડે છે!

નભ અને ધરાનો, સંબંધ છે અનોખો,

ક્ષિતિજે જો ને, કેવાં પ્રેમથી મળે છે!

સફળતાનાં, શિખર સર કરવામાં, 

પ્રયત્નો પણ જો ને, લાંબી સીડી ચડે છે!

જીવવાને આખું, આયખું છે પડ્યું,

માનીને રોજ જો ને, જવાબદારી દોડે છે!

બહુમાળી ‘ને, આલિશાન મકાનોમાં, 

સુખની શોધમાં જો ને, દિવાલો ઝુરે છે! 

“ચાહત” કોઈ, દિલની પુરી કરવામાં,

જિંદગી આખી જો ને, હૃદય રડે છે!!

💕ચાહત💕

હોય છે…

 હોય છે…

કેટલીય વાતો, રહેતી અધુરી હોય છે,

મુલાકાત પ્રેમની, તોય મધુરી હોય છે!

પાન લીમડાનાં, કડવાં હોય છે હંમેશા,

કડવાશ એની, તોય ગુણકારી હોય છે!

વિતે છે વરસો, એક આંકડો બનીને,

કિંમત જિંદગીની, તોય અનેરી હોય છે!

જીવીએ છે જિંદગી, ભરપુર “ચાહત”થી,

લાગણીઓ મનની, તોય કુંવારી હોય છે!!

💕ચાહત💕

લઈને ચાલે છે…

 લઈને ચાલે છે…

હૃદયમાં ભારોભાર, થાક લઈને ચાલે છે,

માણસ ન જોઈતો, ભાર લઈને ચાલે છે!

દિલમાં વસે છલોછલ, પ્રેમની લાગણી

મુખ પર ઘેરો, અજંપો લઈને ચાલે છે!

હોય દ્રઢ વિશ્વાસ, ભલે બાહુબલનો,

મનમાં અતુટ, અંધવિશ્વાસ લઈને ચાલે છે!

હુકમનો એક્કો, ભલે હોય હાથમાં,

પ્યાદું બની, ગતિ અવળી લઈને ચાલે છે!

“ચાહત” થી ભરેલી, છો એની આખી દુનિયા,

નફરત નો હંમેશા, સાથ લઈને ચાલે છે!!

💕ચાહત💕

મળી જાશે…

 મળી જાશે…

હૈયે હામ જો હોય તો, સર્વસ્વ મળી જાશે,

દરેક સવાલનો જવાબ, ચપટીમાં મળી જાશે!

હૃદય, વ્યથાથી ભરપુર, જો હોય તો,

અશ્રુને, હૃદયનો પૈગામ, તુરંત મળી જાશે!

કોઈ ન આવે જોડે તોય, ચાલતો રહેજે, 

મંઝીલ તારી ખુદ તને, સામે આવી, મળી જાશે!

કરી લે ગુફતેગો કદી, ખુદનાં માંહ્યલાં સાથે પણ,

દર્પણમાં કદી તારું સાચું, પ્રતિબિંબ મળી જાશે!

મિજાજ બદલે છે જિંદગી, મૌસમની જેમ,

વસંતની રાહ જોશો તો કદી, પાનખર મળી જાશે!

દાઝ્યાં ઉપર ડામ, લગાવે છે દુનિયા,

 “ચાહત”નો મલમ લગાવી જો, કદાચ જિંદગી મળી જાશે!!

💕ચાહત💕

થઈ નીકળે…

 

 થઈ નીકળે…

સંસ્મરણોની ગલીઓમાંથી, મન પરિભ્રમિત થઈ નીકળે,

કોઈક યાદ એમાંથી, કદીક ઘાતક થઈ નીકળે!

સંબંધ કોઈક એક વિશેષ, મહેકાવે છે જીવન,

અંગત કોઈક સંબંધી, કદીક ખંજર થઈ નીકળે!

સંવેદન પ્રથમ પ્રેમનું, આજીવન સ્મરણ રહે છે,

જુનાં પત્રમાંથી પહેલો સ્પર્શ, કદીક નાગણ થઈ નીકળે!

લાગણીઓનું ઉખાણું, ગણિત છે ગજબનું,

વર્ષો જુની “ચાહત” અચાનક, સવાલ થઈ નીકળે!!

💕ચાહત💕