પડે છે…

પડે છે…

રાજા હોવા છતાંય, વનમાં જવું પડે છે,

દરેકને પોતાનાં ભાગનું, સહેવું પડે છે!

હોય પ્રેમ આપસમાં ભલે, યુગો યુગોનો,

વાંસળી છોડી, સુદર્શન હાથે, લેવું પડે છે!

જવાબદારીઓ અને, ફરજ પુરી કરવા,

બળદ બની ધૂંસરીએ, જોતરાવું પડે છે!

સપનાંના ચણતરથી, ઘર બનાવવાં,

દીવાલોને લાગણીથી, લીંપવી પડે છે!

મુશ્કેલીઓ કે સંકટો, સામે બાથ ભીડવા,

સામી છાતીએ બાથ ભીડી, લડવું પડે છે!

જીવનમાં, નિરાશા કે હતાશાને હરાવવા,

“ચાહત” કોઈ એક રાખી, જીવવું પડે છે!!

💕ચાહત💕 

લઉં છું, રોજ…

 લઉં છું, રોજ…

દુરથી તારાં આગમનને, જાણી લઉં છું રોજ,

જિંદગી! તારાં પગરવને, પારખી લઉં છું, રોજ!

ઘેરાયેલા અકળ મૌન ને, સાથ આપવા,

ઉદાસીને અઢેલીને, બેસી લઉં છું, રોજ!

ટકોરા દે છે સંસ્મરણો, મન ની ડેલીએ,

હળવેથી કમાડ મનનાં, બંધ કરી લઉં છું, રોજ!

છો ઘેરાય વાદળો, ઘનઘોર યાદોનાં હૃદયે,

હળવેથી આંસુ બે છાનાં, સારી લઉં છું, રોજ!

ઢળે છે રોજ દિવસ, ઉગતાં સુરજની આશમાં,

હતાશાની ગર્તામાંથી, ઝાંખી લઉં છું, રોજ!

કોણ અહીં સાથ નિભાવે છે, જિંદગીભર?

“ચાહત” થી બે પળ, જીવી લઉં છું, રોજ!!

💕ચાહત💕

લાગે છે…

 લાગે છે…

કોઈકવાર, ખાલીપાનો ભાર લાગે છે,

યાદોને વાગોળતાં, જીવનમાં સાર લાગે છે!

જીવનભર દોડીએ છે, સુખચેન પામવા,

મળે ત્યારે, બીજાનું સુખ, મોટું લાગે છે!

સમજીએ છીએ કાયમ, પિત્તળને કંચન,

પરખ સુવર્ણ ની આપણી, ખોટી લાગે છે!

પાનખરમાં કાયમ, ખરે છે પીળાં પાંદડાં,

ડાળીઓને કોઈક, નડી જતું લાગે છે!

ભરાતું નથી હૃદય, કદી મીઠી યાદોથી,

આંખોથી વરસતી “ચાહત”, ધોધમાર લાગે છે!!

💕ચાહત💕

હોય છે…

 હોય છે…

ઘણીય ઈચ્છાઓ, રહેતી અધુરી હોય છે,

જીવવાને જિંદગી, તોય મધુરી, હોય છે!

નાની મોટી ભુલોમાંથી, શીખીએ છે નવું કંઈ,

કોઈ એક ભુલ, લાગતી પ્યારી હોય છે!

ખાટાં મીઠાં અનુભવોથી, વિતે છે જિંદગી,

અનુભવ એક, મન ખાટું કરી જતો, હોય છે!

આંસુઓ વરસવાથી, હલકું થાય છે મન,

ઘણાં પ્રસંગે, આંસુ કોરું વહી જતું, હોય છે!

અનેકવિધ સંબંધોને, નિભાવતું હૃદય,

“ચાહત” મનની પુરી કરવાં, ઝંખતું હોય છે!!

💕ચાહત💕

હોવો જોઈએ…

 હોવો જોઈએ…

દિલને દિલથી, મેળ હોવો જોઈએ,

હોઠોથી નકાર, પણ મનથી હકાર, હોવો જોઈએ!

વાદ વિવાદ કે, ભલે હોય મતભેદ, 

તુટે દિલ તોય, મનમેળ હોવો જોઈએ!

જીવીએ છે હંમેશા, મનમાં ભરીને,

આનંદ જિંદગીનો, મન ભરીને, હોવો જોઈએ!

મૌનનાં ઘેરામાં, શબ્દો ઘવાય છે,

નફરત હોય કે “ચાહત” પણ, સંવાદ, હોવો જોઈએ!!

💕ચાહત💕

નીકળે…

 નીકળે…

આંખમાંથી કોઈ, સપનું નીકળે,

દ્રઢ મનોબળ, એને, સફળ કરવા નીકળે!

હાથ, મહેનતને સાથ આપે તો,

વિજયશ્રી, હાર પહેરાવા નીકળે!

ચરણ, અવિરત ચાલ્યાં કરે તો,

મંઝીલ, સરનામું શોધવા નીકળે!

જીભ, કડવાશ ભુલી જાય તો,

મધ, મીઠાશ શોધવા નીકળે!

હૃદય જો લાગણીઓને, ભુલે તો,

પથ્થર, અસ્તિત્વ એનું, શોધવા નીકળે!

અરમાનો બધાં, પુરાં કરીએ તો,

જિંદગી, “ચાહત”, શોધવા નીકળે!!

💕ચાહત💕