સમય લાગે છે…

 સમય લાગે છે…

પાણીને, બરફ થવામાં, સમય લાગે છે,

બાળપણને, ઘડપણ થવામાં, સમય લાગે છે!

ધૈર્ય અને સાહસથી, જીતાય છે દરેક જંગ,

નશીબનાં તાળાંને ખોલવામાં, સમય લાગે છે!

ચાલતાં ચાલતાં, જ્યારે ખાઈએ છે ઠોકર,

પડીને ફરીથી ઉઠવામાં, સમય લાગે છે!

ઘા મળે જ્યારે, અંગતનો પીઠ પાછળ,

આઘાતની, કળ વળવામાં, સમય લાગે છે!

આંખોથી ઓળખીએ છે, દરેક ચહેરાંને,

દિલને દિલથી ઓળખવામાં, સમય લાગે છે!

“ચાહત” મુક્ બની જ્યારે, સહે છે જુદાઈ,

દર્દને આંસુ બની વહેવામાં, સમય લાગે છે!!

💕ચાહત💕

રાખું છું…

રાખું છું…

ગુલાબનું સૌંદર્ય ‘ને, નજાકત જુઈની રાખું છું,

અબળા છું ભલે પણ, કલમ ધારદાર રાખું છું!

લખી ઘણીય લાગણીઓ, દિલનાં કાગળ પર,

મનને અડી જાય એવી કોઈ, હાંસિયામાં રાખું છું!

નિભાવ્યાં કેટકેટલાં સંબંધો, બધાંય દિલથી,

સંબંધ એક નડતરરુપ, હંમેશા સાથ રાખું છું!

પુરી કરી કેટલીય, ઈચ્છાઓ જીવનમાં,

અરમાન એક અધૂરું, જીવવાને ખાસ રાખું છું!

રુઝાયાં ઘણાંયે જખ્મો, જીવન સંસારમાં,

દુઝતો એક ઘા, હૃદયને યાદ અપાવવા રાખું છું!

જીવાતી ગઈ જિંદગી, દર્દ અને ખુશીનાં સંગાથમાં,

“ચાહત” કોઈ અધુરી, જીવવાને ખાસ રાખું છું!!

💕ચાહત💕 

થઈ ગઈ…

 થઈ ગઈ…

લાગણીની, કેવી રમત થઈ ગઈ,

વ્યાપારને નામે, મશહૂર થઈ ગઈ!

તરસતાં રહ્યાં, ઉમ્રભર જેને પામવા,

સંવેદના વિહીન, એ કઠપૂતળી થઈ ગઈ!

છેતરતાં રહ્યાં, હૃદયને હંમેશા,

સંબંધોની દોરી, કેવી ગુંચળું થઈ ગઈ!

દિવસો, બદલાતાં ગયાં વરસમાં,

ચહેરાંની કરચલી, ઉંમર થઈ ગઈ!

અવગણતાં રહ્યાં, આપણે વ્ચક્તિઓને,

દીવાલ પર લટકતી, એ, તસ્વીર થઈ ગઈ!

પૂજતાં રહ્યાં, મંદીરનાં ભગવાનને,

“ચાહત”ની મુર્તી, ખંડેર થઈ ગઈ!!

💕ચાહત💕

નથી મળતી…

 ગાંધીનગર દૈનિકમાં તંત્રી/સંચાલક શ્રી પ્રદીપભાઈ રાવલ તથા શ્રી કૌશિકભાઈ શાહના (USA)

સૌજન્યથી પ્રકાશિત થયેલ મારી એક રચના…

ખુબ ખુબ આભાર, કૌશિકભાઈ😊🙏🏻🙏🏻

નથી મળતી…

સાચી લાગણી એમ, જલ્દી નથી મળતી,

મન જો ન હોય મક્કમ, મંઝીલ નથી મળતી!

મેળવી લો કેટલીય ધન દોલત, ‘ને મિલકત,

ખરી મુંડી સંસ્કારની, એમ રસ્તે, નથી મળતી!

કહેવાતાં સ્વજનો કે, આપ્તજનોની ભીડમાં,

દિલને, ટાઢક દેતી વ્યક્તિ, સહેલાઈથી નથી મળતી!

ઊગતાં સુરજની લાલીમા, આપે છે નવો જોશ,

ડૂબતાં સુરજની છાયામાં, ખુદની હસ્તી નથી મળતી!

પ્રતિક્ષા ભલે કરી લો, આજીવન, “ચાહત”ની,

નશીબમાં જ ન હોય તો, ખરી ચાહત, નથી મળતી!!

💕ચાહત💕

ચાહત છે, તો જીવન છે…

 ચાહત છે તો, જીવન છે…

વિસર્જન થવું નિશ્ચિત છે,

છોડીને જવું, અફર છે!

જીવી લે, મસ્તીથી યાર, 

કાલની ક્યાં, ખબર છે?

સંઘર્ષ જીવનમાં કાયમ છે,

ક્યારેક ઉપર તો, ક્યારેક નીચે છે!

રમી લે હિંમતથી યાર,

સાપસીડીની, એ રમત છે!

હાર જીત, એ તો ક્રમ છે,

ગુમાવ્યાનો છો, રંજ છે!

શીખી લે, નવું કંઈક યાર,

અનુભવ તો, જીવનનું ભાથું છે!

હૃદય છે તો, આઘાત છે,

ક્યારેક ધિક્કાર, તો ક્યારેક “ચાહત” છે!

મનાવી લે, રુઠેલાઓને યાર,

“ચાહત” છે તો, જીવન છે!!

 💕ચાહત💕