હોય છે...

 હોય છે…

કેટલીયે લાગણીઓ, આમ, છુપાવી હોય છે,

દર્પણને મિત્ર માની, આંખો વહાવી, હોય છે!

સુનુ્ં ભાસે જ્યારે, ભીડમાંયે આસપાસ,

હૃદયની શુળ, કંટક બની, ભોંકાતી હોય છે!

ઊંઘની કિંમત, કોઈ, આંખોને પુછો,

કેટલીયે રાતો, જાગરણમાં, વિતાવી હોય છે!

દર્દની વ્યાખ્યા, એ, વિસ્તારથી વર્ણવશે,

દરેક જખમે, વાર્તા, મઝાની હોય છે!

અહેસાસ “ચાહત” નો, હોય છે, અવર્ણનીય,

જિંદગીની એ, અદ્ભુત નિશાની, હોય છે!!

💕ચાહત💕

હોવી જોઈએ...

 હોવી જોઈએ…

દુ:ખને ભુલવા, કોઈ ખાસ દવા,

 હોવી જોઈએ,

મળે ના દવા તો, કબુલ દુઆ, 

હોવી જોઈએ!

સંસ્કૃતિ રોજ અહીં, દ્રૌપદી બની, લુંટાતી,

કૃષ્ણની નજર ફરતી, આસપાસ,

 હોવી જોઈએ!

લાગણીઓ છો લુંટાતી, દિલોનાં વ્યાપારમાં,

ખોટ જો જાય તો, હંમેશા યાદ રહે એવી, 

હોવી જોઈએ!

થાય પુરો, કે રહે અધુરો, પ્રેમ, જીવનમાં,

હૃદય શરમાય, એવી એક ખુબસુરત ખતા, 

હોવી જોઈએ!

ખ્યાતિ મળે કે, મળે ના મળે, જીવનમાં,

ગલીએ ગલીએ, “ચાહત”ની ચર્ચા, 

હોવી જોઈએ!!

💕ચાહત💕

તો, ચાલશે...

 તો, ચાલશે…

પડે ભલે, થોડી અગવડ, તો, ચાલશે,

જો હોય, હિંમત મનમાં, તો, ચાલશે!

કેડી ભલે હોય, કાંટાઓથી ભરેલી,

જો હોય, હમસફર સાથે ચાલનાર, તો, ચાલશે!

અભ્યાસ ભલે, ના હોય વધારે,

જો હોય, કોઠાસૂઝ મનમાં, તો, ચાલશે!

મિત્રનાં, ના હોય મોટાં ટોળાં, તો, 

જો હોય, સારથી એક, કૃષ્ણ સરીખો, તો, ચાલશે!

નરોવા કુંજરોવા, કરવું જ પડે તો,

જો હોય, યુધિષ્ઠિર જેવું જુઠ, તો, ચાલશે!

ભલે ના હોય, પ્રેમ હીર રાંઝા જેવો,

જો હોય, “ચાહત” દિલમાં થોડી, તો, ચાલશે!!

💕ચાહત💕

જોડે છે, ક્યાં તો, તોડે છે…

 જોડે છે, ક્યાં તો, તોડે છે…

મીઠાશ જીભની, 

મનને જોડે છે, ક્યાં તો, તોડે છે,

સ્વભાવ, આમ જ સંબંધોને, 

જોડે છે, ક્યાં તો, તોડે છે!

જિંદગી શીખવાડે છે, 

પાઠ જીવનનાં બહુમુલ્ય,

સમય જ છે, ક્યારેક, 

માણસને જોડે છે, ક્યાં તો, તોડે છે!

સફળતા નાં સર્વોત્તમ, 

શિખરે પહોંચવું હોય છે, અતિ મુશ્કેલ,

દરેક પગથિયું સફરનું, 

હિંમતને જોડે છે, ક્યાં તો, તોડે છે!

નાદાન મન, ફસાય છે, 

લાગણીના વંટોળમાં,

“ચાહત” હૃદયની, ક્યારેક, 

મનને જોડે છે, ક્યાં તો, તોડે છે!!

💕ચાહત💕

થઈ જશે...

 

થઈ જશે...

છો આજ, તમસભરી રાત, કાલ સવાર થઈ જશે,

ચીરીને કાળો અંધકાર, બધે ઉજાસ, થઈ જશે!

નિરાશાનાં વાદળો, તોડી દે છે, મનોબળને,

કાળાં વાદળોની, ઋપેરી કિનાર, દેખાતી, થઈ જશે!

અનેક વિટંબણાઓથી, છો ભરેલું છે, જીવન,

રાહતનો, શ્વાસ લેતો, તું કાલે, થઈ જશે!

રંગો વગરનું, છે, જીવનનું ચિત્ર, આજ,

મેઘધનુષનાં રંગોનો, વરસાદ ધોધમાર, થઈ જશે!

ભરી લે “ચાહત” નો દરિયો, શ્વાસમાં આજ,

નફરત ને, વેરઝેર કાલ તો, દુર થઈ જશે!!!

💕ચાહત💕

લાગે છે, ઈશ્વર વેકેશન પર છે...

લાગે છે, ઈશ્વર વેકેશન પર છે...

વેદના, વાંસળીના સુર બની, રેલાયાં કરે, 

સ્મશાન, નગર બની વસ્યા કરે!

લાગે છે, ઈશ્વર વેકેશન પર છે!!

માણસ, તસ્વીર બની, લટક્યાં કરે,

આંગણું, સુનું બની, રડ્યાં કરે!

લાગે છે, જીવન, વેકેશન પર છે!!

પગલું, એક છાપ બની, ચાલ્યાં કરે,

પડછાયાં, ઓરડામાં, ભટક્યાં કરે!

લાગે છે, જિંદગી, વેકેશન પર છે!!

દવા, બનાવટી બની, મળ્યાં કરે,

માણસ, માણસાઈ, વેચ્યાં કરે!

લાગે છે, માનવતા, વેકેશન પર છે!!

 

ભૂતકાળ, ભૂતાવળ બની, ડરાવ્યા કરે,

વર્તમાન, આગળ વધતાં, અટકાવ્યાં કરે!

લાગે છે, ભવિષ્ય, વેકેશન પર છે!!

લાગણીઓ, આઘાત બની, મળ્યાં કરે,

સ્વજનો, અંગત થઈ, નડ્યાં કરે,

હૃદય, છાનાં આંસુ, સાર્યા કરે,

લાગે છે, “ચાહત”, વેકેશન પર છે!!

💕ચાહત💕