એમ ક્યાં??

 એમ ક્યાં ....?

એમ ક્યાં કંઈ, 

સહેલાઈથી પ્રેમ થાય છે?

જૂઓ તો, રસાયણોનું,

સમીકરણ, થાય છે!

પળભરમાં કોઈ, 

આંખનું રતન થાય છે,

ને, બીજી જ ક્ષણે, 

આંખનું કસ્તર થાય છે!

મિત્રો ની ટોળીઓથી, 

જીવન તરબતર થાય છે,

તો, કોઈક એક, 

વળી, ખંજર થાય છે!

કોઇક પ્યાલો ઝેરનો પી ને, 

મીરાં થાય છે,

તો, કોઈક વિરહી રાધા,

જોજનો દુર થાય છે!

લાગણી, ક્યારેક,

સમાજની શરમે,

બરબાદ થાય છે,

“ચાહત” વળી એમ ક્યાં, 

સહજ થાય છે??

પડે છે...

 પડે છે...

સંબંધને સાચવવાં, જતું કરવું પડે છે,

રોજ પળ પળ મરીને, જીવવું પડે છે!

દિલમાં ભરેલી કડવાશને, છુપાવવાં,

મોંઢેથી, હંમેશા મધુર બોલવું પડે છે!

સાથ જીવનમાં, મનગમતો મેળવવાં,

નસીબ સાથે હંમેશા, ઝઘડવું પડે છે!

હતાશાને, ડરપોક મનથી હરાવવાં,

અવિરત પ્રયત્નો કરી, લડવું પડે છે!

દીવાલો અને છતને, ઘર બનાવવાં,

ફરજ અને લાગણીએ, પીસાવું પડે છે!

બાળપણે, પોતાની પેટની આગ ઠારવાં,

દફતર મુકીને, મજુરીએ જવું પડે છે!

“ચાહત” આપણી, જીવનમાં પુરી કરવાં,

લોહીનાં આંસુએ, કોઈવાર, રડવું પડે છે!!

💕ચાહત💕

છોડી જવાના..

છોડી જવાના...

કોણ, ક્યાં, 

આમ પહોંચી જવાના,

જીવ્યાં અહીં, 

અહીં જ, શ્વાસ છોડી જવાના!

આવશે કોણ, 

સાથ દેવા છેવટે,

બધાં જ બંધન,

 પળમાં, છોડી જવાનાં!

ભેગું કર્યું સઘળું, 

કાવાદાવા થકી,

ભોગવ્યાં વિના, 

એમ જ, છોડી જવાના!

હું જ કરું એ, 

શકટનાં શ્વાન જેમ, 

ભ્રમને ખોટો, 

આમ જ છોડી જવાના!

નામ એનો નાશ છે,

 એ જ એક સત્ય,

મિથ્યા એ મમત,

 આમજ, છોડી જવાના!

ગમતાંનો, કરી લઈએ ગુલાલ,

ને, માણી લઈએ પ્રેમથી, જે મળે તે આજ,

અધુરી, “ચાહત”, નહીં તો, 

પાછળ, છોડી જવાના!!

💕ચાહત💕

શ્રધ્ધા દીપ

 

શ્રધ્ધા દીપ

નથી મશહૂર ગઝલ, 

કે નથી, શાયરીનો શેર,

મનને જે અસર કરે એ,

 કાવ્યનો પ્રકાર છું!

રસ્તો કરે જે, 

આડીઅવળી ડગર પર,

અવિરત વહેતો,

 એ ઝરણાંનો પ્રહાર છું!

સવારે ઊગતો, 

અને સાંજે આથમી જાતો,

તેજસ્વી સુર્ય નો, 

તેજોમય, પ્રકાશ છું!

આત્મબળ થી ઝઝુમતો, 

ને આગળ વધતો, 

સફળતાનો, પ્રચંડ,

પોલાદી વિશ્વાસ છું!

શ્રધ્ધા ના કોડિયામાં, 

આશાની જ્યોતનો,

ઝગમગતો ઝળહળતો, 

દીવડાનો પ્રકાર છું!

તડકો નથી તોય, 

એવો એક ઉઘાડ છું,

નફરત ના ઓળખે એ, 

“ચાહત”નો સ્વીકાર છું!!!

💕ચાહત💕

જાય છે...

જાય છે...

હાંસિયામાં લખવામાં, કાગળ કોરો રહી જાય છે,

મેઘધનુષને રંગવામાં, આકાશ બાકી રહી જાય છે!

હૃદયની લાગણીઓ, વંચાય છે મદહોશ આંખોમાં,

આંખોની ભાષા ઉકેલવામાં, આંસુ, કોરું વહી જાય છે!

બહુરૂપી ચહેરાંઓની, ભરમાર હોય છે ચારેકોર,

અસલી ચહેરો ઓળખવામાં, જીવન વહી જાય છે!

સંબંધોનાં ગુંચળાઓની દોરી, હોય છે ધારદાર,

દોરીની ગુંચ ઉકેલવામાં, સંબંધ, ગુંચવાઈ જાય છે!

સ્વભાવથી માણસની, ઓળખાતી હોય છે, દાનત,

ખરી “ચાહત” ને ઓળખવામાં, વરસો નીકળી જાય છે!!

💕ચાહત💕

કદી, એકસરખી, નથી મળતી..

કદી, એકસરખી, નથી મળતી...

આડી અવળી રાહે,

એમજ, કેડી નથી મળતી,

દરેક જણને, જીવનની ડગર,

કદી, એકસરખી, નથી મળતી!

તુંડે તુંડે, મતિ્ર ભિન્ના, 

માણસોનાં, અવનવાં ચહેરાં,

શોધતાં, માણસાઇ વિશ્વમાં,

કદી, એકસરખી, નથી મળતી!

કદીક વાંકી, તો કદી સીધી,

હોય છે, આ જીવનની રેખા,

દરેક જણને, સહેવાની મુશ્કેલીઓ, 

કદી, એકસરખી નથી મળતી!

સહેલું હોય છે,પોતાનો,

દોષ, બીજાને દેવાનું,

દરેક જણને, ભુલની સજા, 

કદી, એકસરખી, નથી મળતી!

પ્રતિક્ષા, વહેતી રહે છે, 

આંખોની અટારીએથી,

દરેક જણને, પ્રતિક્ષાની પળ,

કદી, એકસરખી, નથી મળતી!

પડછાયાં, બદલાય છે,

કદ પ્રમાણે, લાંબા, કે પછી ટુંકા,

દરેક જણને, શરીરની પ્રકૃતિ,

કદી, એકસરખી નથી મળતી!

કોઈ રાજા, તો કોઈ રંક,

હોય છે, કર્મ પ્રમાણે એમ,

દરેકને જીવનમાં,ભાગ્યની કૃપા,

કદી, એકસરખી નથી મળતી!

જીવન, એક ચોપાટ છે,

ક્યારેક જીત, તો ક્યારેક હાર,

દરેક, હારની સજા સૌને, 

કદી, એકસરખી નથી મળતી!

પાક મહોબત, તો, 

ઈબાદત છે,ખુદાની,

દરેક જણને, “ચાહત” ની મઝા,

કદી, એકસરખી નથી મળતી!!

💕ચાહત💕