કોને ખબર કેમ??

 કોને ખબર કેમ??

કોને ખબર કેમ, ક્રોધ અને પ્રેમ, બે પાસા, ખાસ છે,

કોને ખબર કેમ? સિક્કો એક, બાજુ બે, ખાસ છે!

મન અને નીંદર વચ્ચે, ઋણાનુબંધ કોઈ ખાસ છે,

કોને ખબર કેમ? પાંપણ કેમ, તેથી ઉદાસ છે!

લાગણી, અભિવ્યક્ત થાય છે, આંખોથી પણ,

કોને ખબર કેમ? શબ્દો, તેથી શું, રિસાય છે!

હરખાય છે બાળમન, પથ્થરનાં પાંચીકાથીએ,

કોને ખબર કેમ? ઉંમરની સાથે, મન ઘરડું કેમ થાય છે!

હૃદય, ધડકે છે અવિરત, શરીરને જીવાડવા,

કોને ખબર કેમ? “ચાહત” મનની, 

તોય અધુરી, કેમ રહી જાય છે!!

💕ચાહત💕

જિંદગી...

 જિંદગી…

ટુકડાઓમાં, જીવાય છે જિંદગી,

માસ ‘ને વરસોમાં, મપાય છે જિંદગી!

શ્વાસોની આવનજાવન વચ્ચે,

છુટીછવાયી, જીવાય છે જિંદગી!

સંબંધોનાં બહુરૃપી ટોળાઓમાં,

ક્યારેક જ, ઓળખાય છે જિંદગી!

હાશ કહીને, બેસીએ ત્યાં તો,

નવાં વિઘ્નોથી, સજાય છે જિંદગી!

આજે જીવીશું, કાલે જીવીશું,

કહેતાં, સરકી જાય છે જિંદગી!

મનગમતું, કાયમ મેળવવામાં,

ખુદથી ઘણીવાર, રિસાય છે જિંદગી!

અજાણ રાહે, ચાલતાં ચાલતાં,

કોઈકવાર, અટવાય છે જિંદગી!

“ચાહત” થી સાથ, નિભાવતાં નિભાવતાં,

અનુભવે, પ્રેમથી ઘડાય છે જિંદગી!!

💕ચાહત💕

તું, વાત કર...

 તું, વાત કર...

આંસુઓને, સુકવવાની તું, વાત કર,

પાંપણે સ્વપ્ન, લટકાવવાની તું, વાત કર!

નિષ્ફળતા તો, વધારે છે અનુભવ,

નિરાશ મનને, હિંમત વધારવાની તું, વાત કર!

શબ્દોનાં તીરથી, ઘવાય છે હૃદય,

શબ્દો ચાખીને, બોલવાની તું, વાત કર!

એકલતા મનની, ડરાવે છે મનુષ્યને,

ટોળાં મહીં, એકલતાને અજવાળવાની તું, વાત કર!

ઈચ્છાઓ તો, અનર્ગલ ઉઠતી રહે છે,

“ચાહત” મનની, પુરી કરવાની તું, વાત કર!!

💕ચાહત💕

આશ ન રાખ...

 આશ ન રાખ…

કર્મ તારાં કર્યે જા, 

નસીબની આશ ન રાખ,

કર્મ એ જ જીવન, 

ફળની આશ ન રાખ!

મનથી થઈ જા મક્કમ, 

કર પ્રયત્ન અગાધ,

‘ને, મેળવ તારી મંજીલ,

 જુઠા દિલાસાની, આશ ન રાખ!

કરી લે મજબુત ખભાઓ,

 ને હિંમતથી પડકાર,

દુ:ખ ને આપ તિલાંજલિ, 

કોઈની આશ ન રાખ!

પ્રેમ તું ખુદને કર્યે જા, 

લાગણી રાખ અમાપ,

જીવી લે “ચાહત” થી, 

કાલની આશ ન રાખ!!

💕ચાહત💕

રહેતું હોય છે...

 

રહેતું હોય છે…

કોણ કાયમ, સાથે ચાલતું હોય છે,

જીવન છે! એ તો, માર્ગ બદલતું, રહેતું હોય છે!

ભાગ્યમાં હોય, એ જ મળતું હોય છે,

મન છે! એ તો, મૃગજળ પાછળ ભાગતું, રહેતું હોય છે!

મનનો મુંઝારો, આંખોથી વંચાય છે,

હૃદય છે! એ તો, આમજ રડતું, રહેતું હોય છે!

કસોટીએ, પરખાય છે, કહેવાતો સંબંધ,

લોકો છે! એ તો, ટોળું ચોપાસ ફરતું, રહેતું હોય છે!

દ્વંદ્વ યુધ્ધ લડાય છે, અહમ ‘ને, લાગણીનું કાયમ,

“ચાહત” છે! એ તો, લડાઈમાં મન હંમેશા હારતું, રહેતું હોય છે!!

💕ચાહત💕

Happy Father’s Day😊🙏🏻

 પપ્પા...

જવાબદારી નું, બીજું નામ, પપ્પા,

હસતાં ચહેરે, ભાર ઉપાડે, પપ્પા!

હૃદય પર ભાર પણ, મોં પર હાસ્ય,

હોઠો પર સ્મિતનું, કારણ છે, પપ્પા!

મકાનનું ચણતર, ‘ને આપણું ગણતર,

પાયો મજબુત, કરે છે, પપ્પા!

ખાલી ખિસ્સાં, ‘ને દિલ છલોછલ,

વરસાવે, પ્રેમ દુલાર, પપ્પા!

કેળવણી ‘ને, અનુશાસન નાં આગ્રહી,

કદીક, તીખો વાર કરે, પપ્પા!

દીકરીને ગણે, દિલનો ટુકડો,

પરણાવીને, દિલને સમજાવે, પપ્પા!

સલાહ સુચન, માંગે તો, આપે,

સ્વમાનભેર, હંમેશાં જીવે પપ્પા!

બધાંય માટે, મનગમતું લાવે,

કદીક ના માંગે, કશુંય, પપ્પા!

કદીય જીવનમાં, હિંમત ના હારે,

શૂન્યમાંથી, કરે સર્જન, પપ્પા!

નિર્મોહી મન ‘ને, સાદગી એમનો ગુણ,

સાહિત્યની “ચાહત” સંગાથે, નીખરે, પપ્પા!!

💕ચાહત💕