લાગે છે…

 લાગે છે…

અજબ આ દુનિયાનો, વ્યવહાર લાગે છે,

માલેતુજાર અહીં, લાગણીનો કરજદાર લાગે છે!

શાંતિની ખોજમાં, બહાર ભટકે છે માનવી,

અશાંતિનો ઘંટનાદ, સંભળાતો રોજ લાગે છે!

વિવિધ ભાવો હૃદયનાં, વ્યક્ત કરે છે આંખો,

હૃદય ‘ને, આંખોનો સંબંધ, કોઈ ખાસ લાગે છે!

પોતાનાંઓ હંમેશા, છળી જાય છે જગતમાં,

અંગત ‘ને કપટનો સંબંધ, વિશેષ લાગે છે!

કેટલીય ઈચ્છાઓ, રમતી હોય છે મનમાં,

“ચાહત” મનની પુરી કરવી, એજ સાર લાગે છે!!

💕ચાહત💕

થવી જોઈએ…

થવી જોઈએ…

દિલથી હંમેશા, કોઈ વાત થવી જોઈએ,

લાગણી ના હોય તોય, વાતની,

અસર, થવી જોઈએ!

જાણ કોઈકને, ખાનગી કશું કરીએ તો,

અમુલ્ય એવા સંબંધની,

કદર, થવી જોઈએ!

હૃદયની ભાષા તો, છે ખુબ નિરાળી,

આંખોથી, જો બોલીએ, તો દિલને,

ખબર, થવી જોઈએ!

હોય એક સંબંધ, એવો કોઈ જીવનમાં,

માઠું લાગે તોય, હૃદયની,

ખેંચતાણ, થવી જોઈએ!

“ચાહત” જો, ખરાં મનથી કરીએ તો,

એને પામવાં, સમસ્ત દુનિયા,

સાથ, થવી જોઈએ!!

💕ચાહત💕

શીખ લે પતંગની…

 શીખ લે, પતંગની…

ઉડાવ પ્રેમનો પતંગ ‘ને, કાપ કંકાશની દોરી,

છોડી દે ચિંતા કાલની ‘ને, જીવી લે પળ સોનેરી!

બંધાવ લાગણીની દોર ‘ને, કાપ ઈર્ષાની પુંછડી,

તાણી દે કિન્ના મનની ‘ને, સ્થિર કરી લે ડોર જીવનની!

ભરાવ ઊંચી ઉડાન ‘ને, વિસ્તાર તારું અસ્તિત્વ,

છોડી દે સંકુચિતતા મનની ‘ને, અર્પણ કરી લે તું  સર્વસ્વ!

કપાવ તારો અહમ ‘ને, છોડ ટસલ ફોગટની,

શીખ લે પતંગની ‘ને, જીવી લે તું “ચાહત”થી!!

💕ચાહત💕

જાય છે…

જાય છે…

સંબંધોનાં દોરા જીવનમાં, ગુંચવાય જાય છે,

એક મન સાચવતાં, બીજું તુટી જાય છે!

અંગત કોઈ અચાનક, અજનબી થાય છે,

યાદો ‘ને સંસ્મરણો, અમુલ્ય બની જાય છે!

એક છત નીચે રહેતાં, મન કચવાય છે,

પ્રેમ વિના જીવન, તોય વિતી જાય છે!

દોડતાં ‘ને ભાગતાં, જિંદગી જીવાય છે,

“ચાહત” દિલની ક્યારેક, બાકી રહી જાય છે!!

💕ચાહત💕 

રહી ગયાં…

રહી ગયાં…

સાપ ગયો ‘ને, લિસોટા, રહી ગયાં,

દિલ પર જખમનાં, ઘસરકાં, રહી ગયાં!

હૃદયની ઊર્મીઓ, વિસરાતી ગઈ,

માણસનાં હૃદય, પાષાણ થઈ, રહી ગયાં!

જિંદગી, ક્ષણો બની જીવાતી ગઈ, 

ઉંમર બની વરસો, સરતાં, રહી ગયાં!

સંબંધોની દુનિયા, છે ખુબ અટપટી,

સ્વભાવ મનુષ્યનાં, વિચિત્ર થઈ, રહી ગયાં!

લાગણીનાં નામે, લૂંટાય છે દિલ,

“ચાહત” થઈ કોઈનાં પગલાં, દિલમાં, રહી ગયાં!!

💕ચાહત💕 

પડે છે…

 પડે છે…

આંખોમાં અશ્રુ હોય તોય, હસવું પડે છે,

સંબંધોને સાચવવાં, ક્યારેક, નમવું પડે છે!

અનુભવે થાય છે, અસલ માણસની પરખ,

શુધ્ધ થવાં સુવર્ણએ, કેટલું, ટીપાવું પડે છે!

સતેજ મન છે નિશાની, સ્વસ્થ આરોગ્યની,

સુખેથી જીવવા, ક્યારેક, ઘણું ભુલવું પડે છે!

ઈચ્છાઓ દબાય છે, જવાબદારી તળે,

“ચાહત” મનની પુરી કરવા, ક્યારેક, આજીવન ઝઝુમવું પડે છે!!

💕ચાહત💕