💕ચાહતની 💕કલમેથી...✍️: ચાલ, પહેલાંની દિવાળી ઉજવી લઈએ...

બુધવાર, 11 નવેમ્બર, 2020

માટીનાં કોડિયામાં, તેલ શ્રદ્ધા નું પુરીએ,

ને, ગોખે ગોખે દીવા પ્રગટાવી, રંગોળી રુડી કરી લઈએ,

ચાલ, પહેલાંની દિવાળી ઉજવી લઈએ!

ફટાકડાંઓ નાં ઢગલાંને, ખજાનાંની જેમ સાચવીએ,

ને, ટેટાંઓની લૂમમાંથી, એક એક ટેટો ફોડી લઈએ,

ચાલ, પહેલાંની દિવાળી ઉજવી લઈએ!

રોકેટ ને તારામંડળ નું, રેશનિંગ ફરીથી કરીએ,

ને, કોની પાસે વધુ ફટાકડાં, ગણતરી એની કરી લઈએ,

ચાલ, પહેલાંની દિવાળી ઉજવી લઈએ!

કોઠીના રંગબેરંગી પ્રકાશ ને, અહોભાવથી નિરખીએ,

ને, સાપની ટીકડીને બાળીને, નાક દાબી દઈએ,

ચાલ, પહેલાંની દિવાળી ઉજવી લઈએ!

પેન્સિલને હાથમાં પકડાવી, નાની બહેનને પટાવીએ,

ને, બે ટીકડીની ડબ્બીઓને, લાભપાંચમ સુધી સાચવી લઈએ,

ચાલ, પહેલાંની દિવાળી ઉજવી લઈએ!

સેવ, ચેવડો ને ચકરી ની, ભુખ ફરી ઉઘાડીએ,

ને, કોનાં મઠિયાં સૌથી સારાં, હોડ એની લગાવી લઈએ,

ચાલ, પહેલાંની દિવાળી ઉજવી લઈએ!

મોહનથાળ ને મગસ ની સુગંધને, શ્વાસ માં ફરી ભરીએ,

ને, એક ટુકડો ક્યાંક સંતાડી, શાંતિથી એકલાં ચગળી લઈએ,

ચાલ, પહેલાંની દિવાળી ઉજવી લઈએ!

શુભ લાભ ને સ્વસ્તિક કેરાં, સાથિયા ફરી દોરીએ,

ને, કોની રંગોળી સૌથી સારી, હરીફાઈ એની કરી લઈએ,

ચાલ, પહેલાંની દિવાળી ઉજવી લઈએ!

પાસ પડોશમાં ને શેરીમાં, પગે લાગવાં જઈએ,

ને, નવી નકકોર રૂપિયા ની નોટની, સુગંધ ફરી લઈએ,

ચાલ, પહેલાંની દિવાળી ઉજવી લઈએ!

મિત્રો સાથે વેકેશનમાં, ખુબ મઝા કરીએ,

ને, પતે પોતાનાં તો, દોસ્તોનાં ફટાકડામાં, ભાગ પડાવી લઈએ,

“ચાહત “ જુની દિવાળી ની, જીવંત રાખી,

ફરી એકવાર, નાનાં બાળક બની જઈએ,

ને ચાલ, ફરી પહેલાંની દિવાળી ઉજવી લઈએ!!!

💕ચાહત💕

💕ચાહતની 💕કલમેથી...✍️