💕ચાહતની 💕કલમેથી...✍️: કાન્હા, તું એકવાર, ફરી ધરતી પર આવી તો જો!!!

મંગળવાર, 3 નવેમ્બર, 2020

કાન્હા, તું એકવાર, ફરી ધરતી પર આવી તો જો!

શેષનાગની શૈયાએથી ઉતરી,

સુદર્શન ને, આંગળીએથી ઉતારી,

કદમ નીચે એક, મુકી તો જો,

કાન્હા, તું એકવાર, ફરી ધરતી પર આવી તો જો!

સાંદીપનીનાં આશ્રમ માં ભણ્યાં,

વેદ ને ગીતાનાં જ્ઞાન જાણ્યાં,

પરીક્ષા જીવનની, અહીં આપી તો જો,

કાન્હા, તું એકવાર, ફરી ધરતી પર આવી તો જો!

ગોવર્ધન ને, આંગળીએ ઉઠાવ્યો,

ઇંદ્ર દેવ નો અહંકાર ઉતાર્યો,

જવાબદારી સંસારની, અહીં ઉઠાવી તો જો,

કાન્હા, તું એકવાર, ફરી ધરતી પર આવી તો જો!

સુદામાની મિત્રતા નિભાવવાં,

મૈત્રી કાજે, તાંદુલ ખાધાં,

એક રોટલો, અહીં રળી તો જો,

કાન્હા, તું એકવાર, ફરી ધરતી પર આવી તો જો!

ગોકુળ માં, ગોપીઓની ટોળી,

સંગે શોભે, રાધા ગૌરી,

“ચાહત” દિલની, અહીં મેળવી તો જો,

કાન્હા, તું એકવાર, ફરી ધરતી પર આવી તો જો!

મામા કંસ નો સંહાર કર્યો,

ધર્મ કાજે, યુદ્ધ તું લડ્યો,

કોરોના નો વિનાશ, હવે કરી તો જો,

માનવજાતને હવે, માફ કરી તો જો!

હે, કાન્હા, તું એકવાર,

ફરી, ધરતી પર આવી તો જો!!!

💕ચાહત💕

💕ચાહતની 💕કલમેથી...✍️