હોવું જોઈએ...

 

હોવું જોઈએ...

આપણું પોતાનું એક,

 વર્તુળ હોવું જોઈએ,

પરિઘની બહાર હોય તોય, 

બિંદુ જેવું,હોવું જોઈએ!

આમ તો મળે છે એકલતા, 

ખુશનસીબને,

એકાંત મળે તોય, 

આપણી પસંદગીનું, હોવું જોઈએ!

તરસે મરે છે કોઈ, 

એમ કિનારે રહીને,

તરસ જો છીપાય તોય,

 મૃગજળ પાસે, હોવું જોઈએ!

જીવીએ છે આપણે રોજ, 

એમ મરી મરીને,

મૃત્યુ જો મળે તોય, 

જીવન સલામી દેતું, હોવું જોઈએ!

દિલને મળે છે, 

કોઈ ઠેકાણું નસીબથી,

પારકું જો મળે તોય, 

ઋણાનુબંધ, કિસ્મતમાં, હોવું જોઈએ!

કૃતિઓ રચાય છે, 

લાગણીઓનાં કાગળ પર,

રચના કોઈ સરજાય તોય, 

દિલ ઘાયલ થતું, હોવું જોઈએ!

કલશોર મચાવે છે, 

મનનો અંતરનાદ, 

મૌન બોલાય તોય, 

શબ્દ સાંભળે એવું, હોવું જોઈએ!

અધુરાં સપનાં, 

થકવી નાંખે છે જિંદગીથી,

“ચાહત” પુરી થાય તોય, 

સપનું એકાદ, બાકી રહેતું, હોવું જોઈએ!!

💕ચાહત💕