મળી જાશે…

 મળી જાશે…

હૈયે હામ જો હોય તો, સર્વસ્વ મળી જાશે,

દરેક સવાલનો જવાબ, ચપટીમાં મળી જાશે!

હૃદય, વ્યથાથી ભરપુર, જો હોય તો,

અશ્રુને, હૃદયનો પૈગામ, તુરંત મળી જાશે!

કોઈ ન આવે જોડે તોય, ચાલતો રહેજે, 

મંઝીલ તારી ખુદ તને, સામે આવી, મળી જાશે!

કરી લે ગુફતેગો કદી, ખુદનાં માંહ્યલાં સાથે પણ,

દર્પણમાં કદી તારું સાચું, પ્રતિબિંબ મળી જાશે!

મિજાજ બદલે છે જિંદગી, મૌસમની જેમ,

વસંતની રાહ જોશો તો કદી, પાનખર મળી જાશે!

દાઝ્યાં ઉપર ડામ, લગાવે છે દુનિયા,

 “ચાહત”નો મલમ લગાવી જો, કદાચ જિંદગી મળી જાશે!!

💕ચાહત💕

થઈ નીકળે…

 

 થઈ નીકળે…

સંસ્મરણોની ગલીઓમાંથી, મન પરિભ્રમિત થઈ નીકળે,

કોઈક યાદ એમાંથી, કદીક ઘાતક થઈ નીકળે!

સંબંધ કોઈક એક વિશેષ, મહેકાવે છે જીવન,

અંગત કોઈક સંબંધી, કદીક ખંજર થઈ નીકળે!

સંવેદન પ્રથમ પ્રેમનું, આજીવન સ્મરણ રહે છે,

જુનાં પત્રમાંથી પહેલો સ્પર્શ, કદીક નાગણ થઈ નીકળે!

લાગણીઓનું ઉખાણું, ગણિત છે ગજબનું,

વર્ષો જુની “ચાહત” અચાનક, સવાલ થઈ નીકળે!!

💕ચાહત💕

પણ, બહુ સારો નહીં…

 પણ, બહુ સારો નહીં…

હદથી વધારે, લગાવ પણ, બહુ સારો નહીં,

જિંદગી પર, ખુબ અભાવ પણ, બહુ સારો નહીં!

અનુભવો ઉપરથી, શીખે છે માનવી,

કશુંક ન શીખવાનો, સ્વભાવ પણ, બહુ સારો નહીં!

અભિમાન કે અહમ ભાન ભુલાવે છે,

સારપનો અતિરેક પણ, બહુ સારો નહીં!

જિંદગી નિરંતર, દોડાવ્યા કરે છે,

નવરાશની પળોનો આસ્વાદ પણ, બહુ સારો નહીં!

ન બોલવામાં, નવ ગુણ એ સાચું,

અધિકાર માટે, મૌનનો નાદ પણ, બહુ સારો નહીં!

લાગણીનાં છાંટા, પ્રફુલ્લિત કરે છે,

“ચાહત” નો નિરંતર ધોધ પણ, બહુ સારો નહીં!!

💕ચાહત💕

લાગે છે…

 લાગે છે…

અજબ આ દુનિયાનો, વ્યવહાર લાગે છે,

માલેતુજાર અહીં, લાગણીનો કરજદાર લાગે છે!

શાંતિની ખોજમાં, બહાર ભટકે છે માનવી,

અશાંતિનો ઘંટનાદ, સંભળાતો રોજ લાગે છે!

વિવિધ ભાવો હૃદયનાં, વ્યક્ત કરે છે આંખો,

હૃદય ‘ને, આંખોનો સંબંધ, કોઈ ખાસ લાગે છે!

પોતાનાંઓ હંમેશા, છળી જાય છે જગતમાં,

અંગત ‘ને કપટનો સંબંધ, વિશેષ લાગે છે!

કેટલીય ઈચ્છાઓ, રમતી હોય છે મનમાં,

“ચાહત” મનની પુરી કરવી, એજ સાર લાગે છે!!

💕ચાહત💕

થવી જોઈએ…

થવી જોઈએ…

દિલથી હંમેશા, કોઈ વાત થવી જોઈએ,

લાગણી ના હોય તોય, વાતની,

અસર, થવી જોઈએ!

જાણ કોઈકને, ખાનગી કશું કરીએ તો,

અમુલ્ય એવા સંબંધની,

કદર, થવી જોઈએ!

હૃદયની ભાષા તો, છે ખુબ નિરાળી,

આંખોથી, જો બોલીએ, તો દિલને,

ખબર, થવી જોઈએ!

હોય એક સંબંધ, એવો કોઈ જીવનમાં,

માઠું લાગે તોય, હૃદયની,

ખેંચતાણ, થવી જોઈએ!

“ચાહત” જો, ખરાં મનથી કરીએ તો,

એને પામવાં, સમસ્ત દુનિયા,

સાથ, થવી જોઈએ!!

💕ચાહત💕