પડે છે...

 પડે છે…

મીઠાશથી હંમેશા, બોલવું પડે છે,

કડવાશે દિલમાં, સંતાવું પડે છે,

સંબંધોનાં ત્રાજવાને, સમતોલ રાખવાં, 

નમતું હંમેશા, જોખવું પડે છે!

દરિયાએ કેટલું, ઉછળવું પડે છે,

ખારાશની સાથે, વહેવું પડે છે!

મોજાંઓએ, કિનારે આવવાં, 

ફીણ થઈને, વિલીન, થવું પડે છે!

લાગણીઓએ, આંસુ થઈ, વહેવું પડે છે,

સારા કે નરસાં અનુભવોમાંથી, શીખવું પડે છે,

હૃદયને તોય, શરીરને જીવાડવાં,

દિવસ ને રાત, ધડકવું પડે છે!

જવાબદારીઓથી, રોજ પીસાવું પડે છે,

સમયની સાથે, દોડવું પડે છે,

ફરજ ને, લાગણીનાં યુદ્ધમાં,

મનને, હંમેશા ખેંચાવું, પડે છે!

ઈચ્છાની લગામને, ખેંચવી પડે છે,

મનને ક્યારેક, રોકવું પડે છે,

“ચાહત” થી, સુખરૂપ જીવનને, જીવવાં,

સંતોષનાં જળને, પીવું પડે છે!!

💕ચાહત💕

નથી…

 નથી…

ઝીલવા પડે છે, હથોડીનાં ઘા,

આમજ, ઈશ્વર રચાતો નથી!

સહેવાં પડે છે, આઘાત કેટલાંય, 

આમજ, માણસ પથ્થર, બનતો નથી!

ખરવું પડે છે, વસંતનેય, 

પાનખર બની, વરસમાં એકવાર!

પીળાં પાંદડાઓનો, 

વૈભવી ભૂતકાળ, કદી, ભુલાતો નથી!

પીસાવું પડે છે, ગરીબીને, 

દિન રાત, પેટની આગ ઠારવા!

રોટલો ગરીબીનો, 

મજબુરીની આગ પર, શેકાતો નથી!

જવાબદારીઓની ચાદર ઓઢી, 

નિરાંતે, સુએ છે, માણસ!

રાતની નીંદરમાં, પોઢતો માનવી, 

આમ જ, સફાળો, જાગતો નથી!

કરે છે પ્રહાર, 

પોતાનાં જ, પીઠ પાછળ!

બાકી, “ચાહત” થી ભરપુર માનવી, 

સહેલાઈથી, વહેરાતો નથી!!

💕ચાહત💕

ઈશ્વર, હવે, કર્મોનો હિસાબ, માંગે છે...

 ઈશ્વર, હવે, કર્મોનો હિસાબ, માંગે છે...

વિશ્વ, હવે વ્યથા નહીં, સંવેદના માંગે છે,

માનવની, માનવતાનું અસ્તિત્વ, માંગે છે!

વિશ્વ, હવે, કર્મોનો હિસાબ, માંગે છે!!

મન, હવે લોભ ને લાલચનો, ક્ષોભ માંગે છે,

જરુરતમંદોની જરુરિયાતની, ભીખ, માંગે છે!

મન, હવે, કર્મોનો હિસાબ, માંગે છે!!

પૃથ્વી, તેનો રહેવાનો કર, માંગે છે,

પર્યાવરણ નાં નિકંદનનો, જવાબ, માંગે છે!

સૃષ્ટિ, હવે, કર્મોનો હિસાબ, માંગે છે!!

વૃક્ષો હવે, કુહાડી નહીં, સિંચાઈ, માંગે છે,

પ્રાણવાયુ બચાવવવાની, મદદ માંગે છે!

વૃક્ષો, હવે, કર્મોનો હિસાબ, માંગે છે!!

આત્મા, હવે પરમાત્માનું, મિલન માંગે છે,

જીવમાં, શિવનો અહેસાસ, માંગે છે!

આત્મા, હવે, કર્મોનો હિસાબ, માંગે છે!!

ભાઈચારો ને એકતા, ઉત્સવ, માંગે છે,

ઈદ અને, દિવાળી “ચાહત” માંગે છે!

સૌમાં રહેલો ઈશ, હવે, જવાબ માંગે છે!

ઈશ્વર, હવે, કર્મોનો હિસાબ, માંગે છે!!

💕ચાહત💕

ચાલી ગઈ તું...

 ચાલી ગઈ તું!

હૈયાધારણ બધાયને આપી ને,

 ચાલી ગઈ તું !

હાથતાળી, મને આપીને, 

ચાલી ગઈ તું!

સારું છે આજ, કાલ આવીશ ઘરે હવે!

એમ સમજાવી ને મને, પરગમન,

ચાલી ગઈ તું!

“Last Supper” જેમ ઈશુનું, બસ એમ!

છેલ્લું જમણ જમીને,

 ચાલી ગઈ તું!

હાસ્ય મુખે, સંતોષનું રાખીને બસ!

કડવો એ ઘુંટડો, અમને ગળાવીને,

 ચાલી ગઈ તું!

આમજ જનની શું ,પરાયા ગણયાં તેં અમને!

ને મોતને એટલું “વહાલું” કરી ને,

 ચાલી ગઈ તું!!!

💕ચાહત💕

શું, કામની??

 શું, કામની??

વાત છે, 

વિષાણુંનાં તાંડવની!

ત્યાં, ચર્ચા કરવી, આપણી માનવતાની, 

શું, કામની?

સુનાં છે શહેરો,

‘ને, ખાલી ગામનાં પાદર!

ત્યાં, નિંદા કરવી, ખોટાં આંકડાઓની, 

શું, કામની?

સંભળાય છે, વૃક્ષોનાં નિસાસા, 

સિમેન્ટ નાં જંગલોમાં!

ત્યાં, બુમો પાડવી, પર્યાવરણ બચાવવાની, 

 શું, કામની?

ભગવાન, કાર્યરત છે, 

ડોક્ટરોનાં સ્વરૂપ માં!

ત્યાં, ચર્ચા કરવી, ઈશ્વરનાં અસ્તિત્વની,

શું, કામની?

જિંદગી રોજ, મોત સાથે, ભીડતી બાથ,

“ચાહત”થી જીવવું, પળ બે પળ સાથ!

ત્યાં, રોજ વાતો કરવી, મરવાની,

શું, કામની??

💕ચાહત💕